اسلام آباد۔30مئی(اے پی پی) قائمقام صدر سید یوسف رضا گیلانی آکھیے جو پاکستان اتے آذربائیجان کوں مزید نیڑے گھن آوݨ سانڳے تعلیمی اتے پارلیمانی تبادلیں ، رابطے بہتر بݨاوݨ دی لوڑھ تے زور ݙیندے ہوئیں آکھیے جو ݙوہیں ملکاں وچال تجارتی اتے کاروباری تعلقات بہتر بݨاوݨ دی ٻہوں گنجائش اے ۔ ایوان صدر دے پریس ونگ موجب او آذربائیجان دے وزیر خارجہ جیہون بیراموف نال ڳالھ مہاڑ کریندے پئے ہن جنہاں ایوان صدر اچ انہاں دے نال ملاقات کیتی ۔ پاکستان اتے آذربائیجان معیشت، تجارت، توانائی، مواصلات اتے عوامی رابطے شعبیں اچ ݙو پاسے تعاون مزید بہتر بݨاوݨ دے عزم دا اعادہ کیتے ۔ قائمقام صدر مملکت سید یوسف رضا گیلانی آکھیے پاکستان اتے آذربائیجان وچال مشترکہ ثقافت اتے مذہب تے مبنی گھاٹے تاریخی تعلقات ہن، باکو اچ ملتان سرائے ݙوہیں بھرا ملکاں وچال صدیاں پراݨے تعلقات دا منہ ٻولیندا ثبوت اے ،ݙوہیں ملکاں کوں مزید گھن آوݨ سانڳے باکو اتے ملتان کوں ’’سسٹر سٹیز‘‘ قرار ݙیوݨا چاہیدے ۔صدر مملکت ݙوہیں بھرا ملکاں وچال تعاون دی موجودہ سطح تے اطمینان دا اظہارکیتے۔انہاں آکھیے ݙوہیں ملکاں مختلف بین الاقوامی فورمز تے ھکو سویں خیال رکھیندن۔آذربائیجان دے وزیر خارجہ آکھیے عوامی رابطے ودھاوݨ سانڳے سیاحت، کاروبار تے تعلیم دے شعبیں اچ تعلقات ودھاوݨے ہوسن،پاکستان اتے آذربائیجان وچال تعاون انتہائی اہم اے ،پاک ،آذربائیجان تعاون کوں معیشت، تجارت اتے کاروبار دے شعبیں اچ ودھاوݨا ہوسی، مواصلاتی تے عوامی رابطے ودھݨ نال ݙو پاسے تعلقات تکڑے تھیسن ۔سید یوسف رضا گیلانی مقبوضہ جموں و کشمیر دے مسئلے تے پاکستان دی حمایت تے آذربائیجان دی حکومت دا شکریہ ادا کیتے۔
